Padayong giimbestigar
karon sa National Bureau of Investigation (NBI) ang Local Government Unit (LGU) sa Tukuran, Zamboanga del Sur
pinasubay sa mando sa Department of Justice (DOJ) tungod sa sulat-hangyo-reklamo
sa mga Kagawad sa maong lungsod nga sila si Nahum Dosdos, Pascual Pongase ug
Raul Llagas.
Sumala sa report
gipakanaog ni Kalihim Leila M. De Lima ang mando niadto pang Mayo 10, 2012,
diin ang NBI gihatagan og 15 ka adlaw aron pagsumiter sa ilang report.
Nasayran nga naglisod ang
NBI sa ilang imbestigasyon tungod kay
mismo si Mayor Francis Vic Villamero sa maong lungsod ang nagbabag niini sa
katarongan nga walay Complainant.
Matod sa tinubdan sa
balita ang sulat-hangyo-reklamo sa tulo ka Kagawad nagsumikad sa gikatahapang
kahiwian sa pagpamalit og mga materyales ug ekipo sa maong LGU.
Nahisgotan ang pagpalit og
usa ka Electric Power Generator diin ang napalit wala mahisubay sa
“specifications” nga nasulat sa Purchase Requisition.
Laing makapatahap nga
pagpalit, matod pa, mao ang pagpalit sa usa ka Motor Grader nga “overpriced”
diin ang Supplier nga nakadaog sa bidding didto magpalit sa iyang gideliver nga
grader sa napildi nga bidder.
Laing apil sa
gipaimbestigar usab mao ang pagpalit og “basketball goal and fiberglass board
with electronic score board nga wala motakdo sa “specification” sa Purchase
Order.
Giapil usab pagpalit og
makina sa ambulansya pinaagi sa cash advance nga walay gipahigayong bidding.
Giapil pa gayod
pag-paimbestigar ang tanang mga may anomaliya nga pagpamilit nga mahimong
madiskubrehan atol sa imbesigasyon.
Nasayran nga unang misulay
pag-imbestigar ang Sangguniang Bayan sa maong lungsod, apan napakyas kini kay
wala tugoti sa Mayor ang pagpasusi sa mga dokumento nga may kalabotan sa maong
pagpamalit.
Sa usa ka Memorandum nga
penetsahan og Agosto 25, 2011 si Mayor Francis Vic Villamero mimando sa tanang
“Department Heads. Sanggunian Secretary ug Bids and Awards Committee (BAC)
Secretariat sa dili gayod paghatag ug dokumento o paghatag og impormasyon nga
walay iyang pagtugot.