Ang bag-ong Hepe sa PNP mi-awhag sa suporta sa Publiko sa pagpatuman sa operasyon batok sa tanang matang sa krimen

Ni JONG CADION

PNP Chief Purisima

PAGADIAN CITY - Giawhag sa bag-ong gitudlo nga National Police Chief Director General Alan Purisima ang publiko sa pagsupporta sa ilang kampanya batok sa tanang matang sa krimen.

Matud pa nga walay makab-ot nga kalampusan nga matuman kung ang suporta sa mga katawhan dili makab-ot sa mga ginsakpan sa kapulisan isip maoy usa ka pamaagi sa tugbag sa kasamtangang kakulangon sa gidaghanon sa mga ginsakpan sa kapulisan nga sa pagkakaron dili pa makapatuman sa ratio nga 1 is to 500 kun matag usa ka sakop sa kapulisan 500 ka mga katawhan ang alagaran kini gumikan sa kakulangon sa igong pundo sa nasudnong kagamhanan. 

Mihangyo usab si PNP Chief Purisima ngadto sa mga pamilya sa mga sakop sa kapulisan sa pagsabot nga dili nila makauban tungod sa ilang pagduty sa holiday.

Matud pa ni Purisima nga ang mga ginsakpan sa kapulisan sa Pasko ug bag-ong tuig mihimo sa ilang mando nga panalipdan ang mga katawhang Pilipino batok sa tanang matang sa krimen ug mga tigsupak sa balaod atol sa pasko ug bag-ong tuig.

Gawas sa paggukod sa mga kriminal, giawhag usab niini ang tabang sa paghunong sa pagpamalit sa mga illegal nga mga paboto nga maoy gihatagan usab karon ug pagtagad sa mga ginsakpan sa kapulisan isip pagpatuman sa kamanduan sa Department of Health.

P/Supt. Julius Muñez

Niining pagsaulog sa bag-ong tuig gimanduan ang mga ginsakpan sa kapulisan sa dili pagpaboto sa ilang mga armas aron malikayan ang mga mabiktima sa mga saag nga bala.

Matud pa ni P/Supt. Julius Muñez, officer-in-charge sa Pagadian City Police Station nga ilang kusganong ipatuman ang maong kamanduan ug ilang gipatuman usab ang pagdili sa mga paboto nga giawhag ug ginadili sa Department of Health aron maprotektahan usab ang mga katawhan batok sa mga disgrasya ug mabatunan usab ang maayong panglawas.