Loan assistance alang sa biktima ni Pablo dinhi sa Mindanao

CAGAYAN DE ORO CITY - Ang Pag-IBIG Fund DINHI SA MINDANAO mipahigayon sa paghatag ug calamity loan sa mga miyembrong biktima sa niaging bagyong “Pablo.”

Sa pamahayag ni Juliano S. Banghal, Department Manager III sa Pag-IBIG Fund, makapangayo na ang mga miyembro ug calamity loan kung makapasa na ug ilang nasulatang application form ug uban pang kinahanglanong dokumento sa ilang Fund Coordinators (FCs) o Human Resource Officers (HROs) o Authorized Representatives.

Ang mga kinahanglanong dokumento mao ang Declaration of Being Affected by Calamity - nga napirmahan sa Head of Office o Authorized Representative sa kompanya o ahensya, kopya sa duha ka matang sa Identification Cards (IDs) nga gipamatuod sa Head of Office o Authorized Representative sa kompanya o ahensya ug Certificate of Net Take Home Pay - nga gipirmahan gihapon sa Head of Office o Authorized Representative sa kompanya o ahensya.

Gipahimangno-an ang mga FCs ug HROs nga kolektahon ang maong mga dokumento kalakip ang kompletong listahan sa mga aplikante nga magkuha ug calamity loan.

Mahimong ipasa sa mga FCs ug HROs ang mga papeles kang Mr. Abas o sa Chief of Division sa Pag-IBIG Fund - Malaybalay Extension Office na si Ms. Elizabeth Amarille.