SUPORTA GIKAN SA MGA KATAWHAN ANG GIPANGAYO KARON SA MGA MIPASAKA UG KASONG PLUNDER BATOK SA MAGTIAYONG CERILLES

By JONG CADION

PAGADIAN CITY - Kinahanglan ang Suporta ug pagkabana sa mga katawhan niining amoang gisugdan nga pakigbisug alang sa kaugmaon sa lalawigan sa Zamboanga del Sur pinaagi sa pagpasaka sa kasong pangurakot kun “Punder” batok sa mag-tiayong Cerilles, kini ang mga pamahayag sa 3 ka mga opisyales ug 3 ka kanhi sinaligan sa kagamhanang lokal sa lalawigan sa Zamboanga del Sur atol sa gipahigayong press conference kagahapong adlawa Pebrero 17,2013 didto sa usa tago nga dapit.

Press conference

(Photo by Jong Cadion)

Ang mga mipasaka sa maong kasong Plunder mao sila si Provincial Budget Officer Roger Montealto, Provincial Accounant Bernadeth Bembem Ordonez, Provincial Treasurer Pedro Ramirez ug sila si Mustapha Piang, kanhi executive assistant sa provincial government for Muslim affairs, Raul “Balong” Molina ug Tyrone Singgo, ang kanhi mga sinaligan nilang kanhi Gobernador ug karon Congresista Aurora “Auring” Enerio Cerilles sa ika duhang distrito ug ni kanhi DENR Secretry ug karon kasamtangang Governador Antonio “Tony” Cerilles ning lalawian. 

Sa gihimong press conference, si Tyrone Singgo ang wala nakatambong sa wala pa matino nga hinungdan.

Magtiayong Tony ug Auring Cerilles

Atong kahinumduman nga una nilang gibutyag ang maong pagpasaka ug kaso ngadto sa mga sakop sa media didto sa kauhulan human nila napasaka ang maong kaso didto sa buhatan sa ombudsman basi sa ilang gipermahang pamahayag kaniadtong Enero 24, 2013.

Gibutyag sa mga miakusar nga naila na karon sa ngalang Heritage 6 ang mga hinungdan sa ilang pagpasaka sa maong kaso didto sa buhatan sa Ombudsman nga nagbutang na karon kanila ubos sa witness protection program sa buhatan sa Department of Justice (DOJ) pinaagi sa pagtabang ni Archbishop Antonio R. Tobias, D.D Bishop's Residence sa Good Shepherd Shrine didto sa Regalado Ave., Fairview Park,

Matud pa ni Montealto nga maoy nagsilbing tigpamaba kanila nga dili na madawat sa ilang konsensiya ang mga  gipabuhat kanila nga mohimo sa pagmani-obra sa mga dokyumento aron makawkaw ang salapi sa mga katawhan sa lalawigan nga gibana-banang mokabat na ngadto sa P700 milyones ka pesos ang nawala sa panudlanan sa lalawigan basi sa Commission on Audit Reports.

Ang pagbaton sa paghulga sa ilang mga tagsa-tagsa ka kinabuhi human sila nga dili na mihimo sa ipabuhat kanila ang usa sa hinungdan nganong nagkahiusa sila sa pagbutyag sa mga anomaliya ug mapasaka ngadto sa buhatan sa Ombudsman aron mahatagan ug hustisya ang gihimong pagpangakawat sa panudlanan sa kagamhanang lokal sa lalawigan, matud pa ni Montealto.

Ilahang gibutyag usab nga ang sunod-sunod nga patay nga nahitabo sa lalawigan sa Zamboanga del Sur minugna sa magti-ayong Cerilles, hilabina ngadto sa mga tawo nga maghatag ug babag sa ilang mga binuhatan lakip na usab ngadto sa ilang kaatbang sa politika.

Ang pagpasaka ug kasong plunder batok sa magti-ayong Cerilles ilang gisugdan kaniadto pang tuig 2011 apan wala kini magsilbi gumikan sa kakusog sa ilang impluwensiya sa kaniadtong administrasyon ni PGMA apan sa gihimong matinud-anong kampanya karon sa administrasyon ni PNoy sa pagsubay sa “Tul-id nga dalan” ug sa pagpalagput sa kanhi nga Ombudsman, nakabatun sila sa kadasig ug kaisog sa pagpadayon sa maong kaso, kini ang mga pamahayag ni Provincial Budget Officer.

Matud pa usb ni Balong Molina nga mas misamot ang ilang kaisog nga mipasaka sa maong kaso human nga gipusil ug namatay ang ilang kauban nga si Raul Ganub, gipusil usab apan swerte nga wala namatay si Piang nga diin ang maong nahitabo kanila maoy usa ka kompermasyon nga adunay kamatuoran ang mga taho nga ilang nadawat kabahin sa listahan sa mga ipapatay sa magti-ayong Cerilles.

Giakusahan usab ni Motealto ang magti-ayong Cerilles nga maoy responsable sa pagpapusil kaniya apan salamat nga naluwas siya gikan sa kamatayon. Sumala pa, ang motibo niini mao ang iyang pagbalibad sa pagpagawas  sa pundo nga nagkantidad sa P200 milyones ka pesos nga walay legal nga mga basihanan, 

“Kung magpadayon nga mahadlok kitang mga katawhan, kinsa man ang mohimo sa pagbatok niining mga birdugo? Ang atoang pagpakahilum daw susama nga mihimo kita sa pagtugot nga magpadayon ang ilang pagpangawkaw sa bahandi natong mga katawahan? Busa, amoang pangayuon ang inyong mga suporta ug sa mga nagkalain-laing sector sa katilingban sa pagduyog sa among gisugdan nga pakigbisug,” mutud pa sa ilang mga hangyo. 

“Wala nay laing kahigayunan alang sa kausaban karon nang panahuna ang kahigayunan alang sa tukmang paghiusa ug paglihok,” hangyo pa ni Bembem Ordonez.

Matud pa sa Heritage 6 nga andam nilang isakrepisyo ang ilang kinabuhi aron mabatonan lamang sa maayong kaugmaon ang lalawigan tungod ug alang sa hingpit nga kausaban batok sa hiwi nga pagdumala magti-ayong Cerilles sa local nga kagamhanan sa Zamboanga del Sur.   
 

Kining maong mga akusasyon sa Heritage 6 usa lamang ka political harassment, giakushan usab ang onum nga nabayran sa kantidad nga P5-milyones ka pesos matag usa kanila gikan sa ilang mga kaatbang sa politika aron makabalos kini sa gidangatang disqualification sa COMELEC kaniya, kini ang mga pamayahag sa tigpamaba sa programa sa radyo sa provincial government pinaagi ni kanhi Mayor sa Pagadian City nga si Henry Dogon. (By JONG CADION-February 18, 2013)