De Lima molingkod balik sa Judicial ug Bar Council

Justice Sec. Laila de Lima

Giplanohang molingkod pagbalik si Justice Secretary Leila de Lima isip ex-officio member sa Judicial and Bar Council human nga wala kini nalakip sa talaan sa mga kandidato alang sa pagka chief justice.

Gipatin-aw ni de Lima nga ang iyang paglingkod sa JBC isip ex-officio member usa ka pagtuman sa gimando sa batakang balaud. Sumala sa Article 8 Section 8, nagmando nga ang mahisakop sa JBC ang pagalangkuban sa Chief Justice isip ex-officio chairman, kalihim sa hustisya ug representante sa kongreso isip ex-officio members ug upat ka regular members nga magagikan sa Integrated Bar of Philippines (IBP), professor sa kursong law, retiradong membro sa korte suprema ug sa pribadong pundok.

“Wala koy nakita nga problema sa akoang pagbalik sa JBC,” matud pa ni De Lima

Ang JBC mosabmitar ngadto ni Pangulong Noynoy Aquino sa talaan sa walo ka nominado paka chief justice nga iyang pagapili-an sa dili pa muabot ang Agosto 27, ang katapusang adlaw nga gisitar sa pagtudlo sa bag-ong chief justice.

Kahinumduman nga wala malakip si de Lima sa waloka mga nominado human siya gi-disqualified atubangan sa mga disbarment cases nga gipasaka batok kaniya didto sa IBP.

Lima nga kasamtangang naglingkod isip associate justice sa korte suprema ang nasulod sa walo ka nominado nga gisumiter ngadto kang Pangulo Pinoy. Kini mao silang acting chief justice Antonio Carpio nga nakakuha ug pito ka boto, Roberto Abad, unom ka boto, Arturo Brion, unom ka boto, Maria Lourdes Sereno, unom ka buto, ug Teresita de Castro, lima ka boto.

Ang laing pang tulo mao silang Solicitor-General Francis Jardelez, unom ka boto, kanhi executive secretary Ronaldo Zamora, unom ka boto, ug Ateneo de Manila University Law Dean Cesar Villanueva, lima ka boto.

Kining walo ka mga kandidato nga nakakuha sa unang tolo ka dapit napili human sa makuting pagpili gikan sa may 20 ka mga niminadong kandidato alang pagka chief justice. (J. Cadion with reports from PIA)