KASONG GIATUBANG NI MAYOR CO WALAY KAMATUURAN UG BUTANG–BUTANG LAMANG

Ni JONG CADION

Mayor Samuel Co

PAGADIAN CITY – Pamolitika, butang-butang ug pagdaug-daug gikan sa ilang mga kaatbang sa Politika, mao kini ang gitumbok nga motibo nga nagpaluyo sa kaso sa Aman Scam nga iyang giatubang, kini ang pamahayag ni Pagadian City Mayor Samuel Co, usa ka semana sa wala pa migawas ang Warrant of Arrest batok kaniya.

“Wala nay laing motibo nga nagpaluyo niining tanan kung dili ang akoang mga kaatbang sa politika,” matud pa ni Mayor Co.

Dugang pa ni Mayor Co nga ang paghilambigit kaniya sa maong kaso sa Aman ang may kalambigitan sa matud pa pagpahamtang sa 4% porsyento nga buhis sa operasyon sa Aman dinhi sa Pagadian nga maoy gibasihan sa  Syndicated Staffa. Kining maong argumento ang dakung bakak gumikan kay wala nagpahamtang ug buhis ang kagamhanang local sa operasyon sa Aman.

Kung tinuod man nga adunay buhis nga gipahamtang ang kagamhanang local sa dakbayan sa Pagadian dili pod matawag nga Syndicated Staffa gumikan kay kung dunay makolekta mopaingon man unya sa panudlanan sa local government ug dili man mopaingon sa personal nga bulsa sa mayor.

Ang maong nagreklamo nga nagngalan ug Julius Labunog nga taga Iligan City basi sa iyang affidavit nagtumbok nga wala siyay transaction nga  gihimo sa Pagadian  kabahin sa Aman Future Investment. Hinoon, didto kini mihimo sa iyang investment  direkta sa  Manila ug nagpasabot lamang kini nga walay kalabutan ang dakbayan sa Pagadian, dugang pagpatin-aw ni Mayor Co.

Kompiyansa ang Mayor sa maong kaso gumikan kay walay notice nga iyang nadawat aron makahimo siya  pagtubag maong akusasyon nganha kaniya.   

Sa pagkakaron gipaningkamutan sa mga abogado ni Mayor Co nga makakuha ug Temporary Restraining Order human nga ilang gisubmiter ang Motion for Reconsideration ngadto sa Court of Appeals sa Cagayan de Oro City.

Walay kamatuuran nga milayas na ang Mayor sa dakbayan sa Pagadian, hinoon anaa kini sa iyang official nga biyahe didto sa kauluhan ug mitudlo ni City Councilor Atty. Baldomero Fernandez nga maoy Officer in Charge samtang atua siya sa iyang opisyal nga lakaw, matud pa sa iyang abogada nga si Atty. Trixie Angeles. 

Barikada ug Protest Rally
Usa ka barikada ug protest rally ang gihimo karon diha sa City Hall Complex 
aron ipadungog ngadto sa nasudnong kagamhanan ang naangkon nga INHUSTISYA  ni Mayor Co diin matud pa inhustisya usab kini alang sa mga katawhan sa dakbayan sa Pagadian.