Paglingkud ni Bise Mayor Pulmones pagka Mayor Ilegal matud pa sa kampo ni Mayor Co

By Jong Cadion

April 16, 2013

PAGADIAN CITY – Gi-question karon sa kampo ni Mayor Samuel Co ang paglingkod ni Vice Mayor Romeo “Tata” Pulmones pagka Mayor sa dakbayan sa Pagadian.

(Sa too) Si Vice Mayor Tata Pulmones ug ang iyang abogado

nga si Atty. Kenneth Alivio. (Hulagway ni Jong Cadion)

Si Vice Mayor Pulmones mipuli ni Mayor Co dihang wala na kini nagpakita human nga nag-atubang sa Warrant of Arrest sa kaso nga large scale Syndicated Staffa kabahin sa operasyon sa Aman Investment Scam dinhi a dakbayan sa Pagadian.

Kaganiha sa mga Alas 12:00 ang takna sa udto, sa gihimong press conference didto sa Sangguniang Panglungsud, gipalingkud ni Atty. Kenneth Alivio si Tata Pulmones pagka-Mayor sa Pagadian basi sa sulat opinion nga gipermahan ni Regional Executive Director Paisal O. Aburtazil sa Department of Interior and Local Government (DILG) Region 9  nga isip maoy tubag sa sulat pangutana ni Vice Mayor Pulmones pinitsahan Nobiyembre 5, 2012 kalambigitan sa pagpatuman sa Sec. 46 sa Local Government Code of 1991.

Ang maong sulat sa DILG maoy gilakip sa Memorandum nga gipadala ni Pulmones ngadton sa mga City Department Heads ug Chief of Offices, mga Managers sa tanang Banko, National and Provincial Gov’t Agencies, PNP ug Philippine Army, Po’s ug NGO’s ug uban pang mga hingtungdang ahensya,
hinongdan nga gikataw-an kini sa pipila ka mga residente ug mga opisyal sa dakbayan sa Pagadian.

OIC Mayor Councilor Atty Baleleng Fernandez (Hulagway ni JC)

Gipatin-aw ni Barangay Kapitana sa Jose San nga si Marilou Arao, walay legal nga basihanan ang ilang gigunitang dokyumento ang kampo ni Pulmones sa pagpalingkud kaniya isip akting Mayor sa dakbayan hulip sa gikasuhang alkalde sa Pagadian gumikan kay Nobiyembre 5, 2013 pa ang tubag sa DILG Regional Director sa maong pangutana kalambigitan sa maong hisgutanan.

"Wala man nasuspenso si Mayor Co nga ingun niana lamang ka sayon ilisan ni bisan kinsa," matud pa sa Kapitana Arao.

Gumikan sa maong pitsa, matud pa usab ni Atty Baldomero ”Boy Baleleng” Fernandez, kanhi City Prosicutor ug kasamtangang City Councilor sa dakbayan sa Pagadian nga maoy gitudlo ni Mayor Co nga OIC Mayor sa City Hall nga dugay nang giplano sa kampo ni Pulmones ang pag-ilog sa katungdanan sa pagka Mayor nga walay basihanan ug bugtong iyang abogado lamang ang midumala ug walay tinugyanan nga opisyal sa DILG.

Basi usab sa Memoraandum nga gipadangat ni OIC Mayor Fernandez ngadto sa mga Head ug Chief of Offices nga siya hihapon ang legal nga OIC Mayor.  

Mas gipalig-on pa karon sa mga taga suporta sa kampo ni Co ang ilang pagbantay ug pagbarikada sa palibot sa City Hall nga ilang gihimo kaniadto pang miaging simana aron mapanalipdan ang buhatan sa Mayor samtang wala pa mahibalik. 

Barikada gihimo sa City Hall Complex sa may dalang

Benigno Aquino (Hulagway ni Jong Cadion)

Barikada gihimo sa City Hall Complex sa may dalang

Benigno Aquino (Hulagway ni Jong Cadion)

Barikada gihimo sa City Hall Complex sa may dalang

Benigno Aquino (Hulagway ni Jong Cadion)

Gipamahayag usab sa bag-ong milingkud nga Mayor nga dili na kinahanglan pa nga moadto siya sa City Hall gumikan kay bisan anaa siya sa iyang buhatan sa Sangguniang Panglungsod makahimo man gihapon siya sa pagdumala sa dakbayan isip bag-ong Mayor basi sa Lokal Government Code.  

"Samtang wala pa magpakita si Mayor Sammy Co sa personal aron iyang mapakita ug ipamatuod nga limpyo na siya sa kasong iyang giatubang magpadayon ako sa pagdumala sa katungdanan pagka Mayor aron dili usab ako makasohan sa pag-abandona sa akoang responsabilidad nganha sa katawhan isip ilang pinili.. Apan, kung makabalik na si Mayor Co nga magdala ug TRO pormal na usab akong mokanaug sa akoang paghulip kaniya." Pamahayag pa ni Tata Pulmones. 

Kaalyado sa konsiho ug sa politika ni Vice Mayor Tata

Pulmones mihimo sa pahalipay kaniya human pormal

nga milingkud siya pagka-Mayor sa dakbayan sa

Pagadian. Gikan sa too, BM Mondrte, Konsihal Galon,

BC Ting Matrcaban, Joy Pajares BM Candidate, VM

Pulmones, Brgy. Capt Durano, Konsihal Yamba,

Konsihal Alagenio ug si JCI Senator Konsishal Candidate

Roy Asugas. (Hulagway kuha ni Jong Cadion)