Ni JONG CADION
PAGADIAN CITY - Gitapukan sa mga tawo sayo sa buntag
Oktubre 30, 2012 ang usa ka sakyanang
Everest Ford nga adunay plakang numero KDJ 559 nga maayong pagkapatong sa island
sa dalang FS Pajares Avenue paingon sa ibabaw nga bahin sa Rotonda ning
dakbayan sa Pagadian ug gikatahong walay kinabuhi nga nakalas sa maong aksidente.
Matod pa sa anak sa tag-iya sa maong sakyanan, nga sa
mga alas 12 ang takna kapin sa tungang
gabii, ang iyang amahan nga si Edwin Madarang gikan naghatod sa iyang kauban sa
may ibabaw nga bahin sa Pagadian ug samtang sa iyang pagbahada pauli na unta, paghidangat
sa tunga-tungang bahin sa maong nahitaboan kalit lamang nga aduna kini namatikdan
nga bata nga mitabok sa dalan ug iya kining gilikayan hinungdan sa wala niya
damha nga pagkabangga sa island sa maong dalan.
Si Edwin Madarang ang matod pa naka inom gamay samtang
nagmaneho sa iyang sakyanan ang nakaangkon lamang sa bun-og sa iyang nawong
gumikan sa kusog nga pagkabangga ug ingon man sa batiis tungod usab sa
pagka-ipit niini.
Matod pa sa mga residente nga duol sa nahitaboan nga
ilang gituhoan nga taw-an ang maong dapit gumikan sa daghan nang mga aksidente
nga nahitabo.
Apan matod pa usab sa tinugyanan sa trapiko nga
kinahanglan gayud ang pag-amping sa pagmaneho inig sugod sa pagbahada sa maong
dapit gikan sa Rotonda gumikan sa kataas sa dalan paubos ug aron malikayan usab
ang disgrasya dili gayud moinom kung mopahigayon sa pagmaneho.
