House Bill 3632 gisupak nga mapasar; kalambuan sa lalawigan mapugngan.

PAGADIAN CITY – Ang pagka madali-daliun ug walay tukmang pagkonsulta ngadto sa mga katawhan ang maoy gitumbok nga hinungdan nganong gibabagan ug gisupak nga mapasar ngadto sa Senado ang House Bill No.3632 nga giduso ni First District Cong. Victor Yu ug ni 2^nd District Congresswoman Aurora “Auring” Enerio Cerilles.

Former Dapitan Mayor Dominador

Jalosjos, Jr. (Photo by J. Cadion)

“Dili ako motoo nga irisponsable ang atoang duha ka mga magbabalaud sa lalawigan sa Zamboanga del Sur basi sa mga katarongan sa mga pitisyon nga gipadangat gikan sa mga ginsakpan sa Liga ng mga Barangay sa lungsod sa Labangan, Aurora ug sa ni Mayor Francis Vic Villamero sa Tukuran,” Matud pa sa reaksyon ni Pagadian City Mayor Samuel S. Co ngadto sa atol sa iyang gipatawag nga press conference didto sa City hall ning bag-uhay pa lamang.       

 

Mayor Sammy Co (By J. Cadion)

Matud pa sa ilang gipermahang petisyon gitumbok ang kakulangon sa mga kahibalo nganha sa mga katawhan kung unsay mga tumong ug tinguha sa maong balaudnon ang matud pa maoy hinungdan  kung nganong ilang kusganong gibabagan ang maong balaudnon nga makabaton kita ug ika tulo nga distrito hinungdan nga gipa-oktaba sa duha ka mga Kongresista ang pagpasar maong balaudnon ngadto sa Senado.,” sumala pa ni Mayor Co.

Daku ug pagtoo si Mayor Co nga adunay halum pa nga hinungdan nga nagpaluyo sa pagsupak sa ilang mga kaalyado sa politika gumikan kay ang tumong sa pagpasar sa maong balaudnon mao man ang paghatag unya og dugang nga mga kalambuan sa lalalwigan sa Zamboanga del Sur nga mabaliwala naman unya.  

“Ang pagsupak sa imong mga ginsakpan sa imong mga maayong plano alang sa kalambuan ug ang hinungdan mao ang kakulangon sa konsultasyon nagpasabot kini sa usa ka indikasyon nga huyang ang imong liderato sa pagdumala,” dugang pa sa Mayor sa Paadian.

Kahinumduman nga giaprobahan na sa kamara ang usa ka balaudnon sa pagmugna ug dugang distrito sa lalawigan nga gipasaka ni Cong. Yu ug ni Congresswoman Aurora “Auring” Enerio Cerilles sa ika duhang distrito. Apan, sa wala damha kini ang gipa-oktaba niini basi sa ilang sulat pinirmahan ug penitsahan Agosto 14 sa dihang gikatakda niini ang pagdungog sa komitiba sa Local Government sa Senado aron maaprobahan.

Ang House Bill No. 3632 ang napasar na sa Fifteent Congress atol sa first regular session nga magmugna sa dugang nga Congressional District sa lalawigan sa Zamboanga del Sur.

Kini ang gilangkuban sa 8 ka mga lungsod sa Dumingag, Josefina, Mahayag, Midsalip, Molave, Ramon Magsaysay, Sominot,  ug Tambulig alang sa First Congressional District.

Ang Second Congressional District ang gilangkuban sa dakbayan sa Pagadian ug 3 ka mga kalungsuran sa Aurora, Labangan ug Tukuran ug samtang ang kasamtangan nga 2^nd Congressional District ang magsilbi na nga maoy mahimong 3rd Congressional District nga gilangkuban gihapon sa 15 ka mga kalungsuran sa Bayog, Dumalinao, Dinas, Guipos, Kumalarng, Lakewood, Lapuyan, Margosatubig, Pitogo, San Meguil, San Pablo, Tabina, Tigbao, V. Sagun.

Human kini naaprobahan sa kamara, gisabmitar kini gilayon kaniadtong bulan sa Febrero niining tuiga ngadto sa Senado aron mahisgutan sa komitiba. Apan, nalangan ang pagtuki niini gumikan sa nahitabong impeachment proceeding batok ni Supreme Court Justice Renato Corona nga milungtad ngadto sa halos 6 ka bulan ug niining bulana lamang sa Agosto nabalikan ang paghisgot ang mga nagtapun-og nga mga susamang balaunon sa senado sa pagpangulo ni Senador Ferdinand “Bongbong” Marcos ang chairman sa Committee on Local Government.

Sa gihimong unang pagtawag alang sa committee hearing sa Senado nga kaniadtong Agosto 9, 2012 nakadawat sa imbitasyon si Mayor Co apan sa iyang paghidangat didto sa kauluhan sa wala niini damha makadawat siya ug tawag nga gipa postponed ang maong hearing ni Cong. Yu hinungdan nga mibalik nalang kini ug pauli dinhi sa Pagadian, matud pa ni Mayor Co.

Kaniadtong Agosto 16 nakadawat na usab si Mayor Co ug imbitasyon gikan ni Bongbong Marcos alang sa gikatakda nga Committee Hearing ug giawhag si Mayor Co ug ang mga hingtungdan sa maong imbitasyon nga magdala kini sa ilang position papers kalambigitan sa maong hisgutanan.

Gibutyag ni Mayor Co nga didto sa maong Committee Hearing, wala na usab niya damha nga bugtong siya lamang ang opisyal nga gikan sa Zamboanga del Sur ang mitambong sa maong tigum ug didto gibasa ang sulat penitsahan Agosto 14 nga gipermahan ni Cong. Yu ug Cong. woman Auring Cerilles nga ilang gipa-oktaba maong pagdungog sa maong balaudnon ug kini ang gisupportahan sa mga petisyon gikan sa 5 ka mga Board members sa sazsamtangang ika duhang distrito, Liga ng mga Barangay sa lungsod sa Labangan ug sa Aurora, sulat ni Mayor Francis Vic Villamero sa Tukuran ug sulat usab ni Gov. Antonio Cerilles nga nagpadangat sa ilang mga katarongan sa pagpa-oktaba sa Senata Hearing sa maong balaudnon ug ang bugtong mga baroganan lamang sa dagbayan sa Pagadian ang kusganong miuyon sa pagpasar sa maong balaudnon.

Sa pagkakaron gipaabot ni Mayor Co ang pagpahigayon sa sunod Committee Hearing sa dihang giuyunan ang iyang hangyo ngadto sa chairman sa maong komitiba nga si Senadsor Bongbong Marcos

nga mahatagan ug higayon nga ma schedule pag-usab ang committee hearing alang sa House Bill 3632.

Nasayran nga daghang mga Congressional District nga adunay susamang mga balaudnon nga dungan sa gihimong committee hearing ang napasar ug bugtong Zamboanga del Sur lamang ang adunay talagsaong kahimtang gumikan kay bugtong ang miduso man sa maong balaudnon ang mipadangat sa ilang pagpa-postponed.

Dako ang kawad-on sa lalawigan kung dili madayon ang pagbaton ug dugang congressional district. Ang akoang hangyo lamang mao nga unta wagtangon ang unsa man nga mga personal nga katuyuan ug ang bugtong hatagan ug pagtagad mao ang kalamboan sa lalawigan ug sa mga mayoryang katawhan nga gialagaran. matud ni Mayor Co.

ZSur 1st Dist., Cong. Yu

“Humana ang akoang gimbuhaton sa kongresso ug dugay na kining giduso ngadto sa senado ug dili na jud maapas gumikan sa kaapiki sa panahon,” mao kini ang kanunay nga tubag ni Cong. Yu kung pangutan-on sa mga sakop sa media.

Usa sa mga katarongan mao ang pagkakunhod sa mga sakop sa Board Members sa lalawigan susama karon adunay tag 5 ka mga representanti alang sa una ug ika duhang distrito ug kung mahimong ang ika 3 nga distrito ang kasamtangang 2^nd District mahimong 4 na lamang ug tag 3 ka mga board members alang sa una ug sa ika duhang distrito.

Ang mga katarongan usab sa Labangan mao ang ilang pagkundina sa mga nagpaloyo sa pagmugna nga mapasar ngadto sa Senado ika tulong distrito kay wala kini gihimong konsultasyon ngadto sa mga katawhan.

Samtang sa Aurora ug Tukuran usab, ilang gisaway ang mga dinalian nga pagpasar ug pagmugna sa ika tulong distrito kay walay gihimong pagkonsulta sa mga katawhan.