30 ka Balay Nasunog, P2-Milyones ang Danyos.

By JONG CADION

PAGADIAN CITY – Gibana-bana nga mokabat ngadto sa 30 ka mga balay ang nasunog ug kasamtangan pa nga gi-imbistigahan sa mga tinugyanan sa Bureau of Fire Protection sa pagpangulo ni City Fire Marshal Fire/Chief Inspector Rheno Cimafranca kung pila ang danyos sa mga naugdaw nga mga kabtangan sa nahitabong sunog kaganihang mga alas 2:30 ang takna sa hapon Noviembre 2, 2012.

Ang maong sunog nahitabo didto sa unahang bahin sa Provincial Jail, San Jose PADAP DAO Road, ning dakbayan sa Pagadian.

Matud pa ni Lenie Barrientos ang tag-iya sa balay nga diin didto nagsugod ang sunog, nga brown out sa ilang dapit apan sa dihang pagbalik sa koryente kalit lamang nga adunay miboto ug ilang nakit-an nga nagsiga-siga ang wire sa ilang koryente sulod sa ilang balay hinungdan nga iya  gidali pagpalong ang planka apan sa wala damha misingit ang ilang silingan nga nasunog na ang atop sa ilang balay.

Ang magtiayong Lenie ug ang bana niini nga si Many Barrientos, Provincial Jail Guard ang nagpuyo na sa maong dapit sulod sa 3 ka tuig  diin ang ilang negosyo mao ang pagpangluto ug fishball.

Sa ulahing nakuha nga pasiunang investigation, gibutyag ni Fire Investigator FO2 Jimmy Elis nga mokabat ngadto sa P2 milyones ka pesos ang danyos sa maong sunog.

Matud pa sa nakasaksi nga dali kayo ang pagkaylap sa kalayo gumikan sa kulang pa gayud sa kagamitan sa mga tinuguyanan sa pamatay sunog nga sama sa fire truck ug ingun man fire hydrant kun kuhaanan sa tuig.

Namatikdan usab nga dali kayo mahurot ang tubig sa tanki sa fire truck gumikan kay daot kun leaking ang ubang hose nga gigamit.